MOEE

ရှမ်းပြည်နယ်(မြောက်ပိုင်း)၊ ကျောက်မဲမြို့နှင့် သီပေါမြို့များတွင် အကြမ်းဖက်သောင်းကျန်းသူများ၏ ဖျက်ဆီးမှုကြောင့် လျှပ်စစ်ကဏ္ဍအခြေခံအဆောက်အဦများ ပျက်စီးဆုံးရှုံးမှုနှင့် ပြန်လည်တည်ဆောက်ရေးလုပ်ငန်းများ ဆောင်ရွက်၍ ဓာတ်အားပြန်လည်ဖြန့်ဖြူးမှု အခြေအနေကို အများပြည်သူသိရှိနိုင်ရန် သတင်းထုတ်ပြန်ချက်

၂၀၂၆ ခုနှစ်၊ စက်တင်ဘာလ ၂၃ ရက်

၁။ ကျောက်မဲမြို့နယ်နှင့် သီပေါမြို့နယ်များအတွင်း အကြမ်းဖက်သောင်းကျန်းသူများ၏ ဖျက်ဆီးမှု များကြောင့် ၆၆ ကေဗွီ မန်စံ-သီပေါ ဓာတ်အားလိုင်း၊ ၃၃ ကေဗွီ သီပေါ-ကျောက်မဲ ဓာတ်အားလိုင်းနှင့် ၆၆ ကေဗွီနှင့် ၃၃ ကေဗွီ ဓာတ်အားခွဲရုံ(၃)ရုံ၊ ဖြန့်ဖြူးရေးဓာတ်အားလိုင်းနှင့် ထရန်စဖော်မာများ ထိခိုက်ပျက်စီး၍ ၂၅-၆-၂၀၂၄ ရက်နေ့တွင် ကျောက်မဲမြို့နှင့် ၂၆-၆-၂၀၂၄ ရက်နေ့တွင် သီပေါမြို့တို့ နိုင်ငံတော်ဓာတ်အားစနစ်မှ အသီးသီး ဓာတ်အားပြတ်တောက်ခဲ့ပါသည်။

၂။ ကျောက်မဲမြို့နယ်နှင့် သီပေါမြို့များအား တပ်မတော်မှ ပြန်လည်သိမ်းပိုက်ရရှိခဲ့ပြီးနောက် လျှပ်စစ်နှင့်စွမ်းအင်ဝန်ကြီးဌာနအနေဖြင့် ထိခိုက်ပျက်စီးသွားသည့် ၆၆ ကေဗွီ သီပေါဓာတ်အားခွဲရုံ၊ ၃၃ ကေဗွီ ကျောက်မဲ(ပန်းပေါင်း) ဓာတ်အားခွဲရုံ၊ ၆၆ ကေဗွီ မန်စံ-သီပေါ ဓာတ်အားလိုင်း၊ ၃၃ ကေဗွီ သီပေါ-ကျောက်မဲ ဓာတ်အားလိုင်း၊ ကျောက်မဲမြို့နှင့် သီပေါမြို့များရှိ ၁၁ ကေဗွီ နှင့် ၄၀၀ ဗို့ ဓာတ်အား လိုင်းများနှင့် ၁၁/၀.၄ ကေဗွီ ထရန်စဖော်မာများအား ပြည်ထောင်စုရန်ပုံငွေနှင့် ပြည်နယ် အစိုးရ ရန်ပုံငွေများဖြင့် လျှပ်စစ်နှင့်စွမ်းအင်ဝန်ကြီးဌာန ဝန်ထမ်းများမှ တာဝန်ယူ၍ (၁၅-၁၁-၂၀၂၅) ရက်နေ့မှ စ၍ ပြန်လည်ပြုပြင်တည်ဆောက်ခြင်းလုပ်ငန်းများအား ဆောင်ရွက်ခဲ့ပါသည်။

၃။ ပြုပြင်ခြင်းလုပ်ငန်းများ ဆောင်ရွက်နေစဉ်ကာလအတွင်း သီပေါမြို့တွင် ၆၆၅ ကီလိုဝပ်နှင့် ၂၀၀ ကီလိုဝပ် ဒီဇယ်ဓာတ် အားပေးစက် ၂ လုံးဖြင့် အရေးကြီးနေရာများအားလည်းကောင်း၊ ကျောက်မဲမြို့အား ၂ မဂ္ဂါဝပ် နမ့်စောင်းငေါင်း အသေးစား ရေအားလျှပ်စစ်ဓာတ်အားပေးစက်ရုံဖြင့် စာသင်ကျောင်း၊ ဆေးရုံ၊ ရဲစခန်း၊ ဌာနဆိုင်ရာရုံးများနှင့် ဘာသာရေးအဆောက်အဉီများအား လည်းကောင်း ယာယီ အချိန်ပိုင်း ဓာတ်အားဖြန့်ဖြူးပေးခဲ့ပါသည်။

၄။ ပြည်သူများအား လျှပ်စစ်မီးအမြန်ဆုံး ပြန်လည်ဖြန့်ဖြူးနိုင်ရေးအတွက် လျှပ်စစ်နှင့်စွမ်းအင် ဝန်ကြီးဌာန ဝန်ထမ်းများအနေဖြင့် ကြိုးပမ်းဆောင်ရွက်နိုင်ခဲ့သဖြင့် ၂၂-၉-၂၀၂၆ ရက်နေ့ ၁၁:၀၀ နာရီ တွင် ကျောက်မဲဓာတ်အားခွဲရုံမှ မြို့ပေါ် ၇ ရပ်ကွက် အပါအဝင် ကျောက်မဲပြည်သူ့ဆေးရုံ၊ ဌာနဆိုင်ရာ ရုံး ၂၉ ရုံး၊ စာသင်ကျောင်း ၆ ကျောင်း တို့အားလည်းကောင်း၊ သီပေါဓာတ်အားခွဲရုံမှ မြို့ပေါ် ၁၀ ရပ်ကွက် အပါအဝင် သီပေါပြည်သူ့ဆေးရုံ၊ ဌာနဆိုင်ရာရုံး ၂၁ ရုံး၊ စာသင်ကျောင်း ၇ ကျောင်း တို့အားလည်းကောင်း နိုင်ငံတော်ဓာတ်အားစနစ်ဖြင့် ဓာတ်အားပြန်လည်ဖြန့်ဖြူးပေးနိုင်ခဲ့ပါသည်။ ဆက်လက်၍ ကျန်နေရာများကိုလည်း ဓာတ်အားဖြန့်ဖြူးပေးနိုင်ရေး ကြိုးပမ်းဆောင်ရွက်လျက် ရှိပါသည်။

၅။ လျှပ်စစ်နှင့်စွမ်းအင်ဝန်ကြီးဌာနအနေဖြင့် အကြမ်းဖက်ဖြစ်စဉ်များကြောင့် ပျက်စီးခဲ့သည့် လျှပ်စစ်ကဏ္ဍ အခြေခံအဆောက်အအုံ စက်ရုံ၊ ဓာတ်အားခွဲရုံနှင့် ဓာတ်အားလိုင်းများ ပြန်လည်ပြုပြင် တည်ဆောက်ခြင်းလုပ်ငန်းများအား အားသွန်ခွန်စိုက် ကြိုးပမ်းဆောင်ရွက်လျက်ရှိပြီး ပြည်သူများအား နိုင်ငံတော်ဓာတ်အားစနစ်ဖြင့် လျှပ်စစ်ဓာတ်အား အမြန်ဆုံး ပြန်လည်ဖြန့်ဖြူးပေးနိုင်ရေးအတွက် အလေးထားဆောင်ရွက်လျက်ရှိပါကြောင်း သတင်းထုတ်ပြန်အပ်ပါသည်။

23-Sep-2026

« PREV NEXT »

The Republic of the union of myanmar

Ministry Of Electricity And Energy

Total visitors

နောက်ဆုံးရ တင်ဒါသတင်းများ

အများပြည်သူသို့ ပန်ကြားလွှာ

ဗွီဒီယိုမှတ်တမ်းများ

ဓါတ်ပုံမှတ်တမ်းများ

System Breakdown ဖြစ်စဉ်များနှင့်စပ်လျဉ်း၍ မိဘပြည်သူများသို့ အသိပေး မေတ္တာရပ်ခံခြင်း

သတင်းထုတ်ပြန်ချက်

သတင်းထုတ်ပြန်ချက်

Electricity And Energy

Total visitors